BREAKING NEWSEXCLUSIVEPOLITICS

ජනතා විශ්වාසය පළුදු වී ඇත්තේ බලාපොරොත්තු නොවූ දේවල් කරන නිසා – විමල්

ජනතාව තැබූ විශ්වාසය වඩා පළුදු වී ඇත්තේ, බලාපොරොත්තු වූ දේවල් නොකරන නිසාම නොව, බලාපොරොත්තු නොවූ දේවල් කරන නිසා බව ඇමති විමල් වීරවංශ මහතා පවසනවා.

වර්තමාන රජය ගැන  වැඩිදුරටත් අදහස් දක්වමින් අමාත්‍යවරයා ප්‍රකාශ කර තිබුනේ,

” බලාපොරොත්තු රැසක් සමගින් රටේ වත්මන් පාලනය කෙරෙහි ජනතාව තැබූ විශ්වාසය වඩා පළුදු වී ඇත්තේ, බලාපොරොත්තු වූ දේවල් නොකරන නිසාම නොව, බලාපොරොත්තු නොවූ දේවල් කරන නිසාය. දිගින් දිගටම එයම එලෙස සිදුවෙත්දීත් ජනතාව තුල හටගන්නා අවිශ්වාසය සහ විශ්වාසභංගත්වය පරදවමින් ඉක්මනින් විශ්වාසය තහවුරු කල යුතුව ඇත.”  යනුවෙනි.

තමන් විසින් කැබිනට් මණ්ඩල හමුවේ දී ප‍්‍රකාශ කරන ලද අදහස් විකෘති වී මාධ්‍ය ඔස්සේ ප‍්‍රචාරය වන බවත්, එබැවින්, තමන් සැබැවින්ම එම කැබිනට් හමුවේ දී ප‍්‍රකාශ කළේ මොනවාද යන්නත් පැහැදිලි කරමින්, අමාත්‍ය විමල් වීරවංශ මහතා සිය ෆේස්බුක් ගිනුමේ සටහනක් තබා තිබුනා.

ඒ මෙසේය.

පසුගිය දිනක පැවති කැබිනට් මණ්ඩල රැස්වීමකදී මා විසින් සිදුකරන ලද අදහස් දැක්වීම් කිහිපයක් වැරදි ලෙස අර්ථකථනය කරමින් සමාජ මාධ්‍ය ඔස්සේ හුවමාරු වෙමින් පවතියි.

මා විසින් සිදු නොකරන ලද අදහස් සහ සිදු කරන ලද අදහස් එසේ වැරදි ලෙස අර්ථකතන දෙමින් පතුරවා හරින නිසා එය මෙසේ පැහැදිලි කළ යුතුව ඇත.

එහිදී මා විසින් මතුකළ අදහස් මෙසේය,

බලාපොරොත්තු රැසක් සමගින් වත්මන් පාලනය කෙරෙහි ජනතාව තැබූ විශ්වාසය වඩා පළුදු වී ඇත්තේ ”බලාපොරොත්තු වූ දේවල් නොකරන නිසාම නොව, බලාපොරොත්තු නොවූ දේවල් කරන නිසා ය”.

දිගින් දිගටම එයම සිදුවෙද්දී ජනතාව තුළ හටගන්නා අවිශ්වාසය සහ අපේක්ෂාභංගත්වය පරදවමින් ඉක්මනින් විශ්වාසය තහවුරු කළ යුතුව ඇත.

රටට වැදගත් තීන්දු තීරණ ගනු ලබන කැබිනට් මණ්ඩල පත්‍රිකා කැබිනට් මණ්ඩලයට එක දිනකින් ගෙනවිත් සම්මත කරගන්නවා වෙනුවට ප්‍රමාණවත් කාලයක් තුළ ප්‍රමාණවත් සාකච්ජාවක් කැබිනට් මණ්ඩලය තුළ පවත්වා එම කැබිනට් පත්‍රිකා සම්මත කරගැනීම වඩා සුදුසු ක්‍රමයයි.

එමගින් පසුව වෙනස් නොවන තීරණ ගැනීමට ආණ්ඩුවට හැකියාව ලැබෙනු ඇත.

ජනාධිපතිවරයා සක්‍රීයව දේශපාලනයට මැදිහත් වීම ද ඉතා ඉක්මනින් සිදුකළ යුතුව ඇත.

සාමුහිකව තීන්දු තීරණ ගැනීම වෙනුවෙන් පක්ෂ නායක රැස්වීම් වැනි රැස්වීම් සදහා ද ජනාධිපතිවරයා සහභාගී වීම අතිශය වැදගත් ය.

ගෝඨාභය රාජපක්ෂ ජනාධිපතිවරයා සක්‍රීය දේශපාලනයට මැදිහත්වීම තුළින් බොහෝ ගැටළුවලට විසදුම් ලැබෙනු ඇත.

ඉහත කරුණු පිළිබද මා විසින් කැබිනට් මණ්ඩල රැස්වීමේදී අදහස් ප්‍රකාශ කරන ලද අතර ඒවා විකෘති කරමින් පැතිරවීම වැළක්වීම පිණිස පමණක් ඒවා මෙසේ පැහැදිලි කිරීමට අදහස් කළෙමි.

කැබිනට් මණ්ඩලයේ සාමුහික වගකීමට එමගින් හානියක් නොවනු ඇතැයි විශ්වාස කරමි.

විමල් වීරවංශ,

කර්මාන්ත අමාත්‍ය,

නායක,ජාතික නිදහස් පෙරමුණ

2021.10.09

Related Articles

Leave a Reply

Your email address will not be published.

Back to top button