BREAKING NEWSEXCLUSIVE

රජය අපකීර්තියට පත් කිරීමට සෑදූ ස්විස් නාටකය අවසන් – පැහැරගත් බව කී කාන්තාව මිතුරියකගේ නිවසේ

පසුගිය සමයේ මෙරට බුද්ධි අංශවලට එරෙහි සීඅයිඞී විමර්ශනවලදී වධකයාගේ චරිතයට පණ දුන් පොලිස් පරීක්ෂක ඒඩි‍්‍රයන් නිශාන්ත සිල්වා කන්දප්පා නව රජය බලයට ඒමත් සමඟ ඉකුත් 24 වැනිදා හොර රහසේම ස්විට්සර්ලනත්යට පලා ගියේ ය.

සිය දරු පවුලද සමඟ එසේ පලා ගිය නිශාන්ත සිල්වා කන්දප්පා පසුව එරට සිට විදේශ මාධ්‍යයකට ප‍්‍රකාශයක් කරමින් පවසා තිබුණේ තමන්ට මරණීය තර්ජන එල්ල වීම නිසා ස්විට්සර්ලන්තයට පලා ආ බවකි.

කෙසේ වෙතත් නිශාන්ත සිල්වා කන්දප්පා මෙසේ ස්විට්සර්ලනතයට පැන යෑමත් සමඟම සිදුවූ දෙයක්ද තිබිණි. නිශාන්ත කන්දප්පාගේ පලා යෑම මෙරට ස්විට්සර්ලන්ත තානාපති කාර්යාලයේ පූර්ණ අනුග‍්‍රහය සහිතව සිදුව තිබුණකි.

ඒ අනුව ඔහුගේ පලා යෑමත් සමඟ එම සිද්ධිය ශී‍්‍ර ලංකාව පාර්ශ්වයෙන් ආන්දෝලනාත්මක එකක් බවට පත්වීම හේතුවෙන් අවසානයේ ස්විට්සර්ලන්ත රජයේ ඇඳිවත ගැලවී නිරුවත ලෝකයට හෙළිවන සිදුවීමක් බවට එය පත්වූයේ මෙරට ස්විට්සර්ලන්ත තානාපතිවරයා ඇතුළු කිසිවෙක් නොසිතූ පරිදිය.

මෙහිදී රාජ්‍ය තාන්ති‍්‍රක විශ්වසනීයත්වය අවභාවිත කර තිබීම හේතුවෙන් මෙරට ස්විට්සර්ලන්ත තානාපතිවරයාද සිටියේ බරපතළ උභතෝකෝටිකයකට මැදිවය. මුලදී සරල තැනක තිබුණද නිශාන්ත කන්දප්පාගේ පලා යෑම මොහොතින් මොහොත සංකීර්ණ කරුණක් බවට පත් වෙමින් තිබිණි.

නිශාන්ත සිල්වා කන්දප්පා යනු මෙරට ජනතාවගේ මානව අයිතීන් කඩ කළ බවට චෝදනා එල්ල වී ශී‍්‍ර ලංකාවේ ශ්‍රේෂ්ඨාධිකරණයෙන් වරදකරු වූවෙකි. එසේම ස්විට්සර්ලන්තයට පැන යන මොහොත දක්වාම ශී‍්‍ර ලංකාවේ නීතිය අවභාවිත කරමින් ආන්දෝලනාත්මක විමර්ශන ගණනාවක් සිදු කළ අයකු බවටද ඔහුට චෝදනා එල්ල වී තිබිණි. නිශාන්ත සිල්වා කන්දප්පා මෙරට අධිකරණයක් හමුවේ මිනී මැරුම් චෝදනා එල්ල වූ චූදිතයකුද වේ.

එවන් තත්ත්වයක් තුළ ඉහළින් මානව හිමිකම් කතා කරන ස්විට්සර්ලන්තය වැනි රාජ්‍යයක් නිශාන්ත සිල්වා කන්දප්පා වැන්නකුට දේශපාලන රැකවරණ දෙන්නට තරම් ළඳ බොළඳ තැනකට ඇදවැටීම ලෝකය ඉදිරියේ ස්විට්සර්ලන්තයේ රෙදි ගැලවී යන කරුණක් වීමටත් සියල්ල මෙරට ස්විස් තානාපතිවරයා වන හාන්ස් පීටර් මොක් මහතාගේ නහයට උඩින් යෑමටත් හේතු විය.

ඇතිවූ මේ තත්ත්වය තුළ ඊළඟට සිදුවූයේ කුමක්ද? හෙළිවූ නිරුවත වසා ගනු වෙනුවට ශී‍්‍ර ලංකාවේ ස්විස් තානාපතිවරයා කරනු ලැබුවේ තවත් නාටකයක් කරළියට ගෙන ඒමය. ඒ අනුව නිශාන්ත කන්දප්පා මෙරටින් පලා ගොස් දෙදිනකට පසුව තානාපති කාර්යාලයේ සේවය කරන ශී‍්‍ර ලාංකික කාන්තාවක පැහැරගෙන ගොස් ඇතැයි කියමින් රාජ්‍ය තාන්ති‍්‍රක මට්ටමින් ශී‍්‍ර ලංකා විදේශ කටයුතු අමාත්‍යාංශයට පැමිණිලි කිරීමට ස්විස් තානාපතිවරයා කි‍්‍රයාකරනු ලැබීය.

මෙහිදී අදාළ කාන්තාව සුදු වෑන් රථයකින් පැහැරගෙන ගොස් ඇතැයි මුලදී කී ස්විස් තානාපති හාන්ස් පීටර් මහතා පසුව එය බැහැරකර ඇයව සුදු කාර් රථයකින් පැහැරගෙන ගොස් නිශාන්ත කන්දප්පාට වීසා ලබා දීම සහ තානාපති කාර්යාලයේ අභ්‍යන්තර කටයුතු පිළිබඳ ප‍්‍රශ්න කර ඇති බවත් ඇයට දැඩි ලෙස තර්ජනය කර ඇති බවත් විදේශ අමාත්‍යාංශයට කළ පැමිණිල්ලේ සඳහන් කර තිබිණි.

මෙසේ පැහැර ගැනීමට ලක්වූ බවට සඳහන් කර තිබුණේ ගාලියා බැරිස්ටර් ප‍්‍රැන්සිස් නමැති ස්විස් තානාපති කාර්යාලයේ සේවය කළ මෙරට නිලධාරිනියකි. ඇය ශී‍්‍ර ලාංකික දෙමළ කාන්තාවකි.

නව රජය බලයට පැමිණීමත් සමඟ එල්ලවූ මෙම චෝදනාව ඉතා බරපතළ එකක් විය. එසේම එමගින් ශී‍්‍ර ලංකාවට ජාත්‍යන්තර වශයෙන් විශාල කළුපැල්ලමක් ඇතිවීම ද සැලකිල්ලට ගත් රජය කළේ ස්විස් තානාපතිවරයාගේ එම පැමිණිල්ල ලද විගස ඒ පිළිබඳ වහාම විධිමත් විමර්ශනයක් ඇරඹීමය.

අපරාධ පරීක්‍ෂණ දෙපාර්තමේන්තුවේ විශේෂ කණ්ඩායමක්, සීසීටීවී තාක්‍ෂණය පිළිබඳ විශේෂ පොලිස් කණ්ඩායමක් සහ අපරාධ විමර්ශනයෙහිලා පුහුණුව ලැබූ පොලිස් කණ්ඩායමක් එම විමර්ශනයට එක්ව තිබිණි. මෙහිදී සිද්ධියට මුහුණ දුන් තානාපති කාර්යාලයේ කාන්තාවගේ ප‍්‍රකාශයක් නොමැතිව සියල්ල සිදු කිරීමට වීම විමර්ශකයෝ මුහුණු දුන් බරපතළ තත්ත්වයක් වූහ.

එහෙත් අවසානයේ ඔවුහු පැය විසිහතරක් තුළ සිද්ධිය වූ බව කී ප‍්‍රදේශය අවට ඇති සියලූම සීසීටීවී කැමරා නිරීක්‍ෂණය කරමින් දුරකථන දත්ත විශ්ලේෂණ සහ ජීපීඑස් දත්ත ඔස්සේ පුළුල් විමර්ශනයක යෙදී විද්‍යාත්මක කරුණු රාශියක් එක්රැස්කර තානාපති කාර්යාලය කියන ආකාරයේ පැහැර ගැනීමක් සිදුව නොමැති බවට තහවුරු කරනු ලැබූහ.

තානාපතිවරයා කළ අදාළ පැමිණිල්ලේ සඳහන්ව තිබුණේ සිය කාර්යාල නිලධාරිනිය පාසලකට යන අතරතුර පැහැරගැනීමට ලක්ව තිබූ බවය. එහෙත් විද්‍යාත්මක දත්ත මත සිදු කළ විමර්ශනවලදී අනාවරණය වී තිබුණේ තානාපති කාර්යාල සේවිකාවට අදාළ පාසලට යෑමට කිසිදු හේතුවක් තිබී නොමැති අතර ඇය පැය දෙකක පමණ කාලයක් සිය මිතුරියකගේ නිවසක රැඳී සිට ඇති බවය. ඇය එසේ මිතුරියගේ නිවසේ රැදී සිට ඇත්තේ පැහැර ගැනීම සිදුවූ බව කියන කාලපරාසය තුළය.

මේ තත්ත්වයත් සමඟ විමර්ශන කණ්ඩායමේ ඊළඟ නිගමනය වූයේ පරීක්‍ෂණ ඉදිරියට ගෙන යෑමට නම් අනිවාර්යයෙන්ම පැහැරගැනීමට ලක් වූ බව කියන කාන්තාවගේ ප‍්‍රකාශයක් ලබාගත යුතුයැයි යන්නය.

පසුව මෙම විමර්ශනයෙන් හෙළිකරගත් තොරතුරුද සමඟ මෙරට ස්විට්සර්ලන්ත තානාපති හාන්ස් පීටර් මහතා හමුවූ විදේශ ලේකම් රවිනාථ ආරියසිංහ මහතා සහ ආරක්‍ෂක ලේකම් මේජර් ජෙනරාල් කමල් ගුණරත්න පවතින සත්‍ය තත්ත්වය පිළිබඳ තානාපතිවරයා දැනුවත් කරමින් ඉදිරි විමර්ශන සඳහා වහාම පැහැර ගැනීමට ලක්වූ කාන්තාවගෙන් ප‍්‍රකාශයක් ලබාගත යුතු ඇතැයි තානාපතිවරයාට දැනුම් දෙනු ලැබිණි.

එහෙත් ශී‍්‍ර ලංකාවේ ආරක්‍ෂක ලේකම්වරයා සහ විදේශ ලේකම්වරයා එසේ පවසද්දී ගැසු තුරුම්පුව වැරදී සියල්ල හත්පොළේ ගෑවී ඇති බව වටහා ගත් ස්විට්සර්ලන්ත තානාපතිවරයාගේ ප‍්‍රතිචාරය වූයේ අදාළ කාන්තාව දැඩි මානසික පීඩනය නිසා ප‍්‍රකාශයක් ලබාදිය නොහැකි තත්ත්වයට රෝගීව සිටින බැවින් ඇය සහ පවුලේ සාමාජිකයන් සියලූ දෙනා ගිලන් සේවා ගුවන් යානයකින් ස්විට්සර්ලන්තයේ රැකවරණ සදහා රැගෙන යා යුතුව තිබෙන බවය.

ශී‍්‍ර ලංකාවට විශාල අපකීර්තියක් ගෙන දෙමින් ස්විට්සර්ලන්ත තානාපති කාර්යාලයෙන් එල්ල වූ මෙකී චෝදනාවේදී යම් අපරාධයක් සිදු තිබේ නම් ඒ පිළිබඳ අනාවරණය කරගැනීමකින් තොරව මෙසේ වින්දිතයා රැගෙන යෑම සඳහා ඉල්ලීමක් කිරීමට තරම් ස්විට්සර්ලන්ත තානාපති හාන්ස් පීටර් මහතා ඒ වන විට අන්තයටම ඇදවැටී හාන්සි වී සිටියේ එසේය.

සැබැවින්ම ලොව රාජ්‍යතාන්ති‍්‍රක නියෝජිතයකු මෙතරම් කොඳු බිඳගත් අවස්ථාවක් අපි දැක නැත්තෙමු.

කෙසේ වුවත් තානාපතිවරයාගේ ඉල්ලීමට අනුව අදාළ කාන්තාව සහ පවුලේ සාමාජිකයන් ස්විට්සර්ලන්තයට රැගෙන යෑම සඳහා අවසර දීම ශී‍්‍ර ලංකා රජය සූදානම් නොවිණි. රජයේ මතය වූයේ යම් අපරාධයක් සිදුව තිබේනම් ඒ පිළිබඳ සත්‍ය අනාවරණය කර ගැනීමකින් තොරව ඇයට රටින් පිටව යෑමට අවස්ථාව දිය නොහැකි බවය.

ඒ අනුව සිය තානාපති කාර්යාල නිලධාරිනිය සහ ඇගේ පවුලේ සාමාජිකයන් ස්විට්සර්ලන්ත තානාපති කාර්යාලය තුළ රඳවා තබා ගැනීමට මේ වන විට තානාපතිවරයා පියවර ගෙන ඇත. ඒ හේතුවෙන් මේ දක්වා ඇගෙන් ප‍්‍රකාශයක් ගැනීමට නොහැකි වීම නිසා අදාළ නිලධාරිනියට රටින් පිටව යෑම තහනම් කරමින් අපරාධ පරීක්‍ෂණ දෙපාර්තමේන්තුවට ප‍්‍රකාශයක් ලබා දෙන ලෙසට අධිකරණ නියෝගයක් ලබා ගැනීමටද පොලිසිය කටයුතු කළේය.

එහෙත් සත්‍ය මෙසේ වෙද්දී සුපුරුදු ලෙස පච මාධ්‍ය හමුවක් පැවත්වූ හිටපු ඇමැති රාජිත සේනාරත්න රටට කීවේ ස්විස් තානාපති නිලධාරිනියගේ කටට පිස්තෝලයක් ඔබා තර්ජනය කර ප‍්‍රකාශ ලබාගෙන ඇති බවය.

මේ හේතුවෙන් භීතියට පත්වූ එම නිලධාරිනිය නිවසට ගොස් මේ දක්වා සිය පවුලේ සාමාජිකයන් සමග පවා කතාබහ කර නොමැති බවද කට උල් කරමින් රාජිත සේනාරත්න රට හමුවේ සඳහන් කළේය. එසේම පරාජිත ජනාධිපතිවරණ අපේක්‍ෂක සජිත් පේ‍්‍රමදාස මහතාද යළිත් දුවන කෝච්චියට බෙල්ල තැබුවාක් මෙන් මෙම සිද්ධිය පිළිබඳ ප‍්‍රකාශයක් කරමින් කියා සිටියේ තානාපති නිලධාරිනිය පැහැර ගැනීම ජාත්‍යන්තර වශයෙන් ශී‍්‍ර ලංකවට විශාල අපකීර්තියක් බවය.

පසුගිය කාලයේ කිඹුල් රැවුලා මාධ්‍ය ඉදිරියට රැගෙනවිත් මේ වනවිට පඹගාලක පැටලී සිටින රාජිත මෙන්ම අපේකමට එරෙහිවන සජිත්ගේ දේශපාලනයේ ඇති කුහක බව පෙන්වා දීමට ඔවුන් කරනු ලැබූ මේ ප‍්‍රකාශම ප‍්‍රමාණවත්ය.

රාජිතලාගේ දේශපාලන හැසිරීම මෙසේ වෙද්දී යම් අන්දමකින් මේ කියන තානාපති නිලධාරිනිය අදාළ චෝදනාව කිරීමෙන් පසු ස්විට්සර්ලන්ත තානාපති කාර්යාලයේ රැකවරණ මැද විදේශගත වූයේ නම් මේ රටට අත්වන ඉරණම කෙසේ විය හැකිව තිබිණිද

එසේ වූයේ නම් ලබන මාර්තු මාසයේ මේ රට තුළ මැතිවරණ උණුසුම පවතිද්දී ජීනීවා මානව හිමිකම් කවුන්සිලය තුළ ජනාධිපති ගෝඨාභය රාජපක්‍ෂ මහතා ඇතුළු රජයට එරෙහිව නැගී සිටින ප‍්‍රධාන චරිත දෙකක් බවට රටින් පැන ගිය නිශාන්ත සිල්වා කන්දප්පා සහ ගාලියා බැරිස්ටර් ෆ‍්‍රැන්සිස් නමැති මෙම තානාපති නිලධාරිනිය මතුවීම කිසිවකුටත් වැළැක්විය නොහැකි වනු ඇත.

මෙතෙක් කලක් ජීනිවා මානව හිමිකම් කවුන්සිලය තුළ ශී‍්‍ර ලංකාවට එරෙහිව කරන ලද චෝදනාවලට ද්‍රෝහීහු සාධක කරගනු ලැබුවේද මෙවන් නාටක වූහ. ඒ සියල්ලෙහි නිසි සාක්‍ෂි කිසිත් නොවුණද චෝදනා බොහෝ තිබිණි.

යම් ලෙසකින් මේ කුමන්ත‍්‍රණය සාර්ථක වූයේ නම් එළැඹෙන මැතිවරණ සමයේ රාජිත සේනාරත්න වැන්නවුන් ජනාධිපති ගෝඨාභය රාජපක්‍ෂ මහතා ඇතුළු වත්මන් රජයට එරෙහිව ඊළඟ මඩ ව්‍යාපාරය දියත් කිරීමේ මෙවලම බවට එය තෝරාගෙන තිබුණාද විය හැකිය. එහෙත් වත්මන් රජයේ දූරදර්ශී කි‍්‍රයාදාමය හමුවේ මේ මොහොත වන විට සියල්ල ඇත්තේ ව්‍යර්ථව ගොසිනි.

හන්සයෝ පැන්ස දෙකට වැටී ඇති අවස්ථාවක මතුවී සිටින සැබෑ රාජ්‍ය නායකයකු ඉදිරියේ ස්විට්සර්ලන්ත තානාපතිවරයා සමඟ මේ වන විට රාජිත සජිත් වැන්නවුන්ද කුජීතවී අවසන්ය. සැබැවින්ම නිශාන්ත සිල්වා කන්දප්පා මෙරටින් පලා යෑමත් සමඟ ස්විට්සර්ලන්ත තානාපතිවරයා කරළියට ගෙන ආ මේ නාටකයේ පිටපත නම් හරිම අපූරුය.

එහෙත් රංගනය ගොබ්බ එකක්ම වූ වග මේ මොහොත වන විට ලෝකයට හෙළිවෙමින් ඇත.

සමන් ගමගේ

Related Articles

Leave a Reply

Your email address will not be published. Required fields are marked *

Back to top button