BREAKING NEWSEXCLUSIVEPOLITICS

හෙට සිට රට පුරා විදුළි කප්පාදුවකට යන ලකුණු..!

බලාගාර රැසක දැවිතෙල් අවසන් අදියරට පැමිණීම හේතුවෙන් හෙට (24) රාත්‍රියේ සිට විදුලි කප්පාදුවක් සිදුකිරීමට සිදුවන බව ලංකා විදුලි ඉංජිනේරු සංගමය පවසනවා.

විදුලිබල මණ්ඩල වාර්තාවලට අනුව ජල විදුලිය නිෂ්පාදනය ඊයේ (22) දිනයේ සමස්ත විදුලි ඉල්ලුමෙන් සියයට 25 දක්වා පහළ බැස තිබූ අතර ගල්අඟුරු, ඩීසල් හා දැවිතෙල් මගින් සැපයූ විදුලි ප්‍රමාණය සියයට 72 දක්වා ඉහළ ගොස් තිබේ.

ජාතික විදුලි පද්ධතියට මෙගාවොට් 108ක පමණ ධාරිතාවක් එක් කරන සපුගස්කන්ද බලාගාරය මේ වනවිට සම්පූර්ණයෙන්ම අක්‍රිය වී තිබෙන්නේ එහි ක්‍රියාකාරිත්වයට අවශ්‍ය දැවිතෙල් අවසන්වීම හේතුවෙනි.

විදුලි ඉංජිනේරු සංගමය අනාවරණ කරන ආකාරයට මෙගාවොට් 60ක පමණ කොළඹ වරායේ ස්ථාපිත පාවෙන විදුලි බලාගාරය සඳහා අවශ්‍ය දැවිතෙල් පවතින්නේ තවත් දින එකහමාරක පමණ කාලයකටය.

මෙගාවොට් 24ක ධාරිතාවක් සහිත උතුරු ජනනී විදුලි බලාගාරයේද දැවිතෙල් හා ඩීසල් අවසන්වෙමින් ඇතැයි විදුලි ඉංජිනේරු සංගමය සඳහන් කරනවා.

ඒ අනුව එළඹෙන අඟහරුවාදා දිනය වනවිට මෙගාවොට් 183ක් පමණ ජාතික පද්ධතියට අහිමිවීමට නියමිතය.

ඒ අතරවාරයේ ජාතික පද්ධතියට මෙගාවොට් 300ක් එකතු කරන යුගදනවි බලාගාරය සඳහා අවශ්‍ය දැවිතෙල් අනිවාර්යයෙන් ආනයනය කළ යුතුව තිබේ.

විදුලි අර්බුදය මෙලෙස උග්‍රවී ඇත්තේ ජල විදුලිය නිෂ්පාදනය පහත බැසීම හා නොරොච්චෝලේ බලාගාරයේ මෙගාවොට් 300ක ජනන යන්ත්‍රයක් අක්‍රිය වී ඇති පසුබිමකය.

නොරොච්චෝලේ බලාගාරයෙන් අහිමි වූ විදුලි ධාරිතාව ලබන 26 වනදා පමණ වනවිට යළි එක්කිරීමට හැකි වනු ඇති බවට විදුලිබල මණ්ඩලය විශ්වාසය පළ කරයි.

Related Articles

Leave a Reply

Your email address will not be published.

Back to top button