OTHERSPORTS

“රාත්‍රී ආහාරයට දී ඇත්තේ පාන් – නේවාසිකාගාර ඩෙංගු රජ දහනක්” මළල ක්‍රීඩකයන් වෙනුවෙන් නව ක්‍රීඩා ඇමතිගෙන් තද තීරණ

මෙවර සාග් ක්‍රීඩා උළෙල වෙනුවෙන් ශ්‍රී ලංකාව නියෝජනය කළ මළල ක්‍රීඩා කණ්ඩායමේ ක්‍රීඩක ක්‍රීඩිකාවන් 13 දෙනෙකුට ඩෙංගු උණ සහ තවත් 07 දෙනෙකුට උණ රෝගය වැළඳී ඇත්තේ ඔවුන් ශ්‍රී ලංකාවේ දී තාවකාලිකව නවාතැන් ගත් සුගතදාස නේවාසිකාගාර වල මදුරු කීටයන් රැඳී සිටීම හේතුවෙන් බව අනාවරණය වී තිබේ.

මේ සමඟම තත්ත්වය පිළිබඳ සොයා බැලීම සඳහා අධ්‍යාපන, ක්‍රීඩා හා තරුණ කටයුතු අමාත්‍ය ඩලස් අලහප්පෙරුම අද පෙරවරුවේ සුගතදාස ක්‍රීඩාංගන පරිශ්‍රයේ නිරීක්ෂණ චාරිකාවක නිරතවිය.

සුගතදාස හෝටල් පරිශ්‍රය සහ ක්‍රීඩාංගන පරිශ්‍රය ඉතා අපිරිසිදු කැලිකසල බහුල පරිශ්‍රයක් වන අතර මේ වනවිට අදාළ හෝටල් පරිශ්‍රය තුළ මදුරු කීටයන් බහුලව ගැවසෙන බව ඊයේ (08) දිනය තුළ කොළඹ නගරසභාවේ වෛද්‍ය නිලධාරී කණ්ඩායම සහ සෞඛ්‍ය වෛද්‍ය නිලධාරීන් විසින් තහවුරු කර තිබේ.

“කාලයකට පසුව රටේ ක්‍රීඩක ක්‍රීඩිකාවන් දකුණු ආසියානු ක්‍රීඩා තරගාවලියේදී දස්කම් දක්වමින් රන් පදක්කම් 36 ක් දිනා ගත්තා. නමුත් මේ තරගාවලියට එක්වූ බොහෝ දෙනා උණ රෝගය වැලදීම නිසා මානසිකව පසුබෑමකට ලක්වුවා. එමෙන්ම උණ රෝගය උත්සන්න වීම නිසා තරගාවලියට සහභාගිවීමට නොහැකිවූ ක්‍රීඩක ක්‍රීඩිකාවන් සිටිනවා. මේ රටේ ක්‍රීඩා ඇමතිවරයා වශයෙන් මම දරුවන්ගෙන් සමාව ඉල්ලනවා.

මම මේ දරුවන්ගේ දෙමව්පියන්ට කතා කළා. මේ අයගෙන් වැඩි පිරිසක් ගම්වල ඉතාම අහිංසක දරුවො. මේ රටට කීර්තිය ගෙන දෙන මේ වගේ දරුවන්ගෙ ජීවිත එක්ක සෙල්ලම් කරන්න එපා. රටට ක්‍රීඩාවෙන් කීර්තිය ගෙන එන්නට වෙහෙසුණ මේ දරුවන්ට අත්වූ අමිහිරි සිදුවීම සම්බන්ධයෙන් මා නිහතමානී ව ඉතා කණගාටුවට පත්වෙනවා. මේක මගේ කාලෙ වුණ දෙයක් නෙවෙයි කියලා ඇඟ බේරාගන්න දේශපාලනයක් නෙවෙයි අපි කරන්නෙ” අමාත්‍ය ඩලස් අලහප්පෙරුම ප්‍රකාශ කර සිටියා.

එහිදී ක්‍රීඩක ක්‍රීඩිකාවන්ට ලබා දී ඇති ආහාර පිළිබඳවද නව ක්‍රීඩා ඇමතිවරයාගේ අවදානයට යොමු විය. ඇතැම් දිනවල රාත්‍රීයේ ඔවුන්ට ලබා දී ඇත්තේ පාන් සහ පොල් සම්බෝල බවද වාර්තා වේ.

මේ සම්බන්ධව අද දිනයේදී ජනාධිපතිතුමා හමු වී සාකච්ඡා කර මෙරට මළල ක්‍රීඩා කණ්ඩායම මුහුණ දෙන කණගාටුදායක තත්ත්වය සම්බන්ධව එතුමන් දැනුවත් කොට, ඉතා ඉක්මණින් ඔවුන්ට අවශ්‍ය සියලූම පහසුකම් ලබා දීමට පියවර ගන්නා බවද ඇමතිවරයා කියා සිටියා.

එමෙන්ම බාධා රැසක් මධ්‍යයෙහි මාතෘභූමිය රනින් සැරසූ දකුණු ආසියානු ක්‍රීඩා උළෙලේ දරුදැරියන්ට රජය මැදිහත් වී කිසියම් වන්දි මුදලක් හෝ අනුග්‍රාහක දීමනාවක් ලබාදීමට ද, පදක්කම්ලාභී දරුවන්ට ජාතික මට්ටමේ ඇගයීමක් සිදුකිරීමට ද කටයුතු කරන බව අමාත්‍යවරයා තවදුරටත් ප්‍රකාශ කළේය.

එමෙන් ම ජනාධිපතිතුමන් සහ අග්‍රාමාත්‍යවරයා ‍මෙම ජයග්‍රාහකයින් සහ පසුගිය දා අන්තර්ජාතික කැරම් තරගාවලියෙන් අනුශුරතාව දිනාගත් ශ්‍රී ලාංකික කණ්ඩායම ඉතා ඉක්මණින් හමුවීමට සූදානමින් සිටින බව අමාත්‍යවරයා සඳහන් කර සිටියා.

Related Articles

Leave a Reply

Your email address will not be published. Required fields are marked *

Back to top button